Локалната самоуправа и „Комуналец“, ги започнаа активностите за одбележување на Денот на пролетта.
На крајот од улицата Беровска во така наречената населба Мексико, ЈКП,, Комуналец’’- Прилеп, и Локалната самоуправа започнаа со чистење на дива депонија која е распослана се до заштитената зона од Марковите кули.
Оваа дива депонија комплетно се исчисти во 2022 година. И покрај апелите од јавното претпријатие до локалното население да внимаваат на животната средина и да си го зачувуваат просторот околу живеалиштата, оваа неконтролирано исфрлање на отпад никако да престане.
Жителите пак од околните куќи велат дека и покрај тоа што од јавното претпријатие доѓаат да го собираат отпадот, неможат да се справат со одредени жители кои во ноќните часови доаѓаат на оваа локација и исфрлаат разноразен отпад.
Како и да е, јавното претпријатие е задолжено да ги чисти сите диви депонии околу градов, иако истите се чистат еднаш, а некои диви депонии се чистат по неколку пати во годината.
Утре е 21 Март – Денот на пролетта за кога од страна на Локалната самоуправа и „Комуналец“, планирано е да се продолжи со чистење на диви депонии, засадување на нови садници од јапонска цреша, црвена слива и украсна туја на повеќе локации во градов.
Воедно, Денот на пролетта ќе биде одбележан со голем пролетен хепенинг за најмладите во новиот инклузивен парк на Могилата.






